泰贊- 創意泰餐廳 (已結業)

香港人真係好鍾意食泰菜，我都係，每隔一段時間，就會戚起條筋想食泰國野。響尖沙咀區，如果想食泰菜既話，我一定會去So Thai So Good，皆因其地點就腳，就響美麗華中心入面，而且菜式新穎又精緻，特別容易打動女孩子的心。黎到So Thai So Good，一定要試佢地既乳酪特飲，好fresh，我尤其鍾愛佢既芒果椰子乳酪，酸酸甜甜，同乳酪好夾，上面仲有一塊新鮮芒果肉，好甜，正！愈普通既菜式，愈能顯出大廚功架，呢個椒絲通菜，炒完仲好翠綠，食落去嗦嗦聲，唔會炒到腍bat bat，有水準。椰青肉炒蜆，係一般泰國餐廳較少見，感覺好清新，忍唔住飲左幾啖湯；不過可惜既係，蜆肉有少少過熟，有少少韌，美中不足。泰式炸蝦餅，好香脆，熱辣辣，配合甜酸醬同青瓜，成功減少油膩感。大蝦金邊粉，隻大蝦幾鮮甜，金邊粉都炒得唔錯，唔會食到成口油，加埋爽口既芽菜同香蔥，好味，記得淋少少青檸汁調味，好開胃。