太平洋餐廳酒吧 (已結業)

星期六晚睇完演唱會，正在又渴又餓之際，行經呢間特別小店，有酒飲亦有野食，而且仲播放着音樂，感覺不錯啱哂我，一於坐低食啲野飮番杯酒先返歸。餐廳燈光柔和，外邊有小小彩色燈泡掛飾，室內亦有不同裝飾擺設，牆上有李小龍相片，帶點懷舊浪漫感覺。餐廳提供多元化不同酒精類飮品；還有水煙；亦有一些小食和炒飯之類。最後隨便看著圖片，然後點了兩款食物「Chilli MoMo 」($65) 和「Pork Choila」($65)。落完order 後，外籍店長即時用心製作，雖然大概好似等了半小時左右，但絕對係有驚喜，真係超好味道，絕不馬夫，不是求其油炸就算，品嚐到放了很多香料，味道十分豐富回味，而且份量也不算少。配埋杯啤酒完美。目測店員應該像是尼泊爾人，但其實我也不太肯定。雖然食物需時製作，其實飲住杯啤酒，聽著音樂，係一間咁舒服小店坐坐，也是很悠然舒暢，一間不錯的小店。