醉胡爐 (已搬遷) 新店位置

朋友約食飯話食醉胡爐，聽個名以為係食中菜，估唔到原來係食日式法餐！！地點係尖沙咀韓國街嗰邊，喺佐敦地鐵站行過去就近啲。超大個招牌，離遠已經見到。先來一個黑松露野菌沙律，好多黑松露好多菇，開胃👍🏼煎鵝肝，底下唔係餅乾，係魷魚片，夠鹹香，不過我就鍾意分開食多啲，可以食清楚鵝肝嘅油香。三文魚他他，賣相好靚，三文魚他他成朵花咁，配埋細細塊嘅餅乾食，味道清新。甲羅燒，有好多蟹肉，兩個人share一隻食就得。壽司拼盤有8件，全部都好新鮮，我最鍾意就係海膽同埋蝦壽司。到我最期待嘅海膽意大利飯喇！成板海膽，好新鮮！分開食又得，夾埋飯食又得，估唔到加埋意大利飯食又幾夾，兩樣都好creamy！生蠔唔算好大隻，不過都幾鮮甜。黎到甜品環節，鳳梨焦糖燉蛋，賣相幾靚，燉蛋亦都有好濃嘅菠蘿味👍🏼分子番薯糖水，番薯同糖水變成一粒粒，另外有個薑汁味雪芭，幾得意。