文東記

营业中

休息中

疫情前曾經喺新加坡食過兩、三次海南雞飯名店「文東記」，幾年後就喺開咗兩、三個月嘅香港分店回味吓佢哋嘅出品。星期日下午茶時段嚟到，見到有tea set menu，決定食白切雞配油飯跟兩件脆皮豆腐嘅下午茶餐。細細碟嘅白切雞，外表似新加坡分店嘅出品，都係白皮雞肉。店家幾乎比晒雞胸肉，但肉嘅口感係OK嘅，唔算柴，仲有一件近脾位嘅有少許啫喱狀物體（優質白切雞嘅標準）。當然，呢種白皮雞都預咗冇乜雞味，其實大家喺新加坡食到嘅海南雞大多數都係咁樣，同樣冇乜雞味。至於油飯好細碗，外表感覺同白飯差無幾，但食落都夠味，而且感覺唔太油膩。三碟醬汁黑豉油、辣椒醬同薑蓉就正常發揮啦。另外，嗰兩件脆皮豆腐相當水嫩，真係做到外脆內軟嘅效果，好食😋。呢餐連埋一支味道幾清新嘅薏米水都係雙位數價錢埋單，算喺咁囉。