鼎豐雞煲泰國菜 (已結業)

話說陪就快做老襯嘅朋友去金都買嘢，買完搵嘢食，好少喺呢度附近食嘢，行咗去後面砵蘭街，見到呢間有雞煲食，又好耐冇食過雞煲，就揀佢啦！“招牌雞煲”，叫咗小辣試試，雞煲上枱炒一炒，嗰陣香辣味充滿空氣之中，聞就得喇，食入口夠哂惹味，但我發覺唔似小辣，朋友食到津津有味，我就滿頭大汗，哈哈！店員叫我地下次試吓泰式雞煲，話又另一番風味！而家仲做緊食雞煲送肥牛一碟，超抵！呢度最大特色係有泰國菜食，先叫碟“生蝦”，都幾新鮮肉質夠爽！“泰式拼盤”有春卷、蝦餅同魚餅，配埋一大枝2L嘅Hoegaarden生啤，正呀！“馬拉盞炒通菜”又係炒得香噴噴，食落去會越食越想食！“椰汁西米糕”唔太甜，飽餐之後剛剛好！呢度地點又唔錯，食物又好，唔怪得老友即刻book定星期六帶其他朋友再嚟食！