鳴越 Pho (已結業)

星期六晚一支公食咩好呢，喺中環街市附近呢條街充滿着經濟實惠嘅晚餐選擇，比我見到新開左一間越南野，個名好熟口面，叫鳴越，問吓門口個侍應原來係上環總店嘅第一間分店。咁啱俾我見到呢度除咗傳統嘅越南食物之外，仲有羊腩煲！咁特別點可以唔試吓呢。羊腩煲餐（ $108 ），係熱辣辣嘅鍋仔上，仲包左生菜籃，一碗白飯。羊腩熱辣辣好暖身，又唔算好肥，配白飯都好唔錯呀。飲品方面，食越南野又點少得滴滴咖啡呢，加$20就可以試到啦。滴滴咖啡係用咗煉奶係底，當咖啡喺上面滴晒落嚟，就可以攪勻佢啦。滴滴咖啡嘅味道貼近茶餐廳嘅茶走，但又冇咁甜，充滿越南風味。