環境
1
1
彌敦道726號成棟都係餐廳咁制，都試過當中幾間，呢間「Running燒」係幾年前黎食過，果時係食單點韓國菜，估唔到已經變成任食燒肉店。餐廳唔算好大，但都坐得舒適。
價錢特定時段有優惠，而我地嚟就食Running燒任食110分鐘 $258+10%。
點餐紙免費項目3張紙，另一張係加錢飲品類別。
1
餐廳提供一塊生蘿蔔，用以比食客清潔鐵板，我食咁多次燒肉都係第一次見，幾特別。
牛/豬/香腸
1
基本上所有牛既款式都點匀咁制，大部份都已經調味，當中醬汁牛五花肉、烤肥牛等醃得入味，火力夠，燒幾下已經食得，唔擔心會有老既問題。而豬方面，有較少見任食燒肉店有嘅豬頭枕，姐係豬勁脊肉，仲有回本既黑豚豬肉，唔少得韓式燒肉必不可少既五花肉等等。豬類既色澤都好靚，紋路清晰，肉質實而不韌，五花肉又唔算太肥，包生菜食啱啱好。至於香腸就正常冇特別。
雞/羊
雞翼好貼心地已經開左邊，方便煮熟，同樣本身有調過味，皮燒至焦黃再食，值得encore！仲有辣味雞肉、雞腎，後者夠爽口。有我鍾意食嘅羊肉，雖然得羊脾肉同香草羊西冷兩款，但羊味突出，頗夠羶香，都滿足到愛羊之士。
海鮮
揀呢間餐廳嘅原因之一仲有$300唔洗有得任食海鮮，當中最回本嘅心數係生蠔！仲有帶子、扇貝都係任食！生蠔好大隻，都洗得夠乾淨，冇乜腥臭味，食左4,5隻，而帶子就要比較有技巧地燒，否則好易痴底，要加比較多油同不斷翻面燒，都幾彈牙，扇貝、大蝦就正常。
麵/飯/湯/小食
叫左個什果沙律，估唔到咁大碗，份量驚人！少見放題有水冷麵食，所以就算咁飽肚都叫咗碗，有用冰挫底，夠凍夠開胃。亦試左炒粉絲，算入味，不過有幾條未熟。不能不試炸雞，估唔到外脆內嫩滑，而且味道十足，放題界中較高質嘅炸雞！
總括而言，韓式燒肉店$300唔洗一位，價格合理，肉類大部份都已調味，所以唔會有味淡問題，最尾仲送每人一條雪條，捧住個肚走吖！
