Twinkle Baker Décor (已結業)

母親大人今日生日，其實之前週末已經出咗去食飯慶祝，不過今日話晒係正日，所以放工就喺屋企附近買個蛋糕返去俾佢切吓。呢間「扮清糕」，個名夠過癮，而且平時路經此地已經覺得啲蛋糕淨係買來影相都抵，因為真係好靚又有gimmick。凍櫃裏面嘅蛋糕真係有好多款式，有老人家嘅壽桃款，又有小朋友嘅Lego款，真係每個都好靚！最近仲同天仁茗茶搞crossover，將台式飲品融入喺蛋糕入面，應該都幾受歡迎！仲有蛋黃哥伏喺菠蘿包入面，賣相都已經攞滿分💯！不過我始終鍾情於「姣粉」，而且仲係士多啤梨味，母親大人最鍾意！依家佢哋仲有網上商店，落單就更方便啦！食完晚飯一拎個蛋糕出嚟，大家都爭住話要影相，因為呢個粉紅甜心真係好靚！一輪合照之後，就切蛋糕見下佢嘅真身，入面係一層層嘅草莓慕絲同原味海棉蛋糕，中間仲有一層流心嘅草莓果醬加新鮮草莓，蛋糕外面並唔係用糖皮，而係用比較硬身嘅忌廉做裝飾，所以呢個蛋糕不單止外表靚，入面都真係好好食，真係值回票價！