養心麵 (已結業)

朋友告知有間新開嘅台灣車仔麵店，一於今晚約埋去試吓！去到大約 18:15 左右，可能時間尚早，店內只得兩位客人，我哋坐低就一人拎一張落單紙慢慢揀。其實註明由台灣直送嘅食物唔算好多，不過朋友見到新竹米粉同豬腳仔已經雙眼發光，當晒自己去咗台灣咁喇！落單首先要揀食邊種麵，要乜嘢湯底同埋醬料，然後再揀餸。我剔咗台式寬粉條、美人湯(清湯)、麻辣醬(小辣)、香菇貢丸、A菜 & 千層冰豆腐，仲有一杯杞子菊花圓玉露。落單時先知今日冇A菜，要改食唐生菜，老實講有啲失望，誰知呢個只係失望嘅開始咋...！朋友話魚蛋細粒得嚟唔彈牙，我嘅貢丸就粉粉哋唔爽口，冰豆腐都唔多好食；不過湯底有我近期至愛嘅桃膠，而寬粉條又唔係咁容易食到，杯杞子菊花圓玉露又幾好飲，尚可板回一啲分數啦！