德記潮州菜館

营业中

休息中

多年之後重遊到舊地，規模大左好多，菜式更加五花八門，多咗好多非正宗潮州菜。6:00pm去到，大把位任揀，企咗喺門口一陣都冇人理，跟住自己走咗入去求其搵張枱。環境望落去光猛衛生，不過地下就油泣泣，行路都有少少想跣親嘅感覺。先來支啤酒，諗好咗食乜嘢就落單，等咗一陣就好快上菜。例牌滷水鵝，都幾多肉，冇乜肥油，少骨，係唔錯嘅，不過滷水汁淡咗啲，下底嘅豆腐亦都唔係好滑。椒鹽鮮油好失望，一開始已經覺得唔脆，等咗一陣再食，全部林晒，椒鹽嘅味道都冇乜，可以講話係難食。蠔餅粉漿太厚，煎得太耐，好乾，蠔仔好少，唔肥滿，熟到乾晒，好多䓤，似蔥油餅多啲，都係難食嘅。潮州炒河，份量夠，料都幾足，不過似乎淨係用咗啲無味嘅豉油炒，完全冇魚露鮮味，唔正宗。服務方面，就唔好有咩期望，基本上啲服務員唔叫就唔郁，大多數都係木無表情，零溝通。整體相對起其他香港潮州老店，德記係比較遜色一間，佢應該仲可以做到街坊生意，不過我就唔會再特登過嚟⋯⋯