排隊排咗接近一個鐘但完全冇後悔！真係超級好食，先講佢嘅開心果糖不甩刨冰，唔會死甜，真係食到好真材實料嘅開心果味，開心果入口即溶，濃郁嘅開心果，慢慢喺個口度擴散，入邊嘅糖不甩份量好多，超級煙靭有咬口，又完全唔會有麵粉味同開心果刨冰配埋一齊好正，成個刨冰唔單止有糖不甩，仲竟然有綿滑嘅開心果雪糕，個雪糕好有驚喜同埋比較優質，連雪糕都好用心好重開心果味，仲好似識拉絲咁，開心果迷即係我食到啲咁重開心果味嘅刨冰真係勁開心！
然後就係杜拜朱古力開心果刨冰，佢一半係黑朱古力嘅味道，另外一半就係開心果嘅味道，開心果嘅味道就係開心果糖不甩刨冰嘅味道，黑朱古力偏苦比較適合一啲唔鍾意食甜嘢嘅人，但上面嘅餅碎有啲難欣賞，一直都覺得杜拜朱古力嘅餅碎應該係開心果味，但佢嘅餅碎好似冇乜味，有少少怪，我認為就咁食開心果味會好過杜拜朱古力味。
成間餐廳氛圍都係比較夢幻風格，佢哋嘅燈用咗雲朵嘅造型，位置都算舒適廣闊，適合同朋友一齊聚餐。
