黃枝記粥麵店 (已搬遷) 新店位置

完全唔明佢憑乜可以取得八個笑口分數。中環店我一次都未食過。反而銅鑼灣店我食過兩三次。但每一次都失望，所以立下宏願，黃枝記不結業，誓不入店。（澳門店除外，因為澳門有不少必食的美食，次次去都未有機會試佢正店）。每次食都一定食雲吞麵，麵永遠都係淋到比街頭爛貨仲要惡劣，好狗仔粉少少，要數全港食店最淋身的雲吞麵，佢稱皇，冇人夠瞻企出稱霸，佢的Target Customer應該主打冇牙的老人家。湯的確係好，是屬於一流貨色，雲吞一口一粒，蝦及肉混合很好，也是水準之上。由於麵實在失分嚴重，其他幾好都假，廿幾銀，我去正斗、麥奀好過。食第一次失望，當佢一時失手，之後再去過一兩次，都係一而再再而三令我失望，呢條過江虫真係洽我香港人唔識食。呢個質數都可以自誇為雲吞麵高手，唔洗出動正斗、麥奀、何洪。只用名氣不足的灣仔富城、深水劉森記都足以打謝佢。拆佢對聯為「無酒安能邀月飲，有錢最好食麥奀」，一於將「雲吞」改為「麥奀」押韻一。