諗住食得過就算 點知十分足料兼好食
難怪去到大排長龍 要等 不過都值嘅
皇帝蝦 king size! 蝦頭爆膏 爽彈鮮甜
花膠又多(有六七件)又厚(約半邊手掌大)
鮑魚大小適中 肉質軟帶唔韌 略帶鮮味
花菇隻隻飽滿厚肉 爽滑且菇味濃厚
巨型鯪魚球彈牙富陳皮香 成功令我對鯪魚改觀
墨魚丸多粒粒 有咬口兼爽彈鮮味
完成以為兩款丸係一般平價嘢
但觀乎口感同唔太平滑嘅表面 似係手打
魚腐好多件 索湯一流 豆腐咁滑
豬皮豬手媲美花膠 入味兼軟滑到離骨 食極都有
鵝都唔錯 肉味濃郁
芋頭蘿蔔兩盒另上 墊埋落底大盆到就瀉
倒落隻32吋鑊燜煮 堆到座山咁好震撼
芋頭超綿入口即溶 蘿蔔冇渣清甜入味
仲有零星魷魚蠔豉 同一隻鵝掌 意外驚喜
湯膽好特別 與傳統盆菜相比偏淡
但好鮮甜 當湯飲都唔渴 (兩杯珍奶咁多)
整體而言水準平均 樣樣都好出色
外叫多半隻雞 嚿嚿厚肉 OK有雞味
即使髀位雞皮薄到透光 令人驚艷
皮肉之間有啫喱 睇嚟有過冷河
老老實實齋食盆菜已經夠飽 唔洗特別加料
物超所值 遠超期望 成家人都讚好正
唯一缺點係不設送貨服務 (加錢都冇)
石頭咁重 要跨區自取辛苦過舉鐵
必定會回頭 希望你哋堅持熱誠
