川大哥

营业中

休息中

今晚又突然好想食川菜，係openrice度搵搵下，比我發現深水埗呢間川大哥。呢度唔同於一般嘅川菜餐廳，除咗有成日見開嘅水煮魚同埋酸菜魚，呢度仲有一個我之前未見過嘅菜式就係青藤椒鍋啦！佢呢度嘅青藤椒魚鍋係一定要食，佢有得畀我哋選擇生魚片定係鯛魚片。咁我哋就叫咗一個細嘅微辣青藤椒鯛魚片魚鍋。先講份量，佢嘅份量非常之多，雖然只係一個細嘅魚鍋，但係魚片嘅數量都好多，兩個人食都好足夠飽。青藤椒嘅味道真係好香好吸引，小辣唔算太辣，岩曬我唔係好食得辣又想過下口癮既人，而且鯛魚片都好爽口，又冇骨，完全唔會有話驚有魚片多骨嘅問題。呢度嘅炒萵筍絲都不得了啊，又新鮮，亦都好爽口。再黎就叫左3隻蒜香生蠔，亦都非常好食，大大隻生蠔配加埋好濃厚嘅蒜香味，入口味道一流。真係好大隻架食川菜唔少得既麻辣鴨血，又香又辣，主角唔止鴨血，上面d蒜我都覺得好好味。重有串燒厚牛利，呢個雖然叫左小辣，但係辣味唔講得笑，食得辣既朋友一定鍾意，但對於我黎講就有d辣啦！食完咁多辣嘢，嘆返壺武夷岩茶，茶香味甘，清熱降火。