丼丼屋 (青衣城1) (已結業)

由於地點好就腳所以成日去，可以話一諗唔到食乜嘢就去食呢間 哈哈。今日公眾假期去都要等好耐位下，但入座之後職員都好有禮貌咁招呼我。最鍾意呢一種日式餐廳張凳下邊有個籃可以俾你擺袋，唔使成日攬住晒所有嘢食飯。今次叫咗個滑蛋鰻魚飯，加二十五蚊就可以要埋湯，沙律，同埋一款小菜，我就揀咗炸豆腐。所有嘢即叫即整所以都要等一陣。大約等左10分鐘嘢食終於黎。滑蛋鰻魚飯好香，啲蛋真係好滑。雖然個鰻魚擺埋入去個蛋到，但都唔會冇咗鰻魚同埋燒汁嘅味。佢個飯底本身已經撈左汁所以好夠味。份量都好足 一個大男人都會食得飽。只係飲品喺度唔係幾抵，加$10都只係得汽水或者糖漿開嘅果汁。所以都係飲水算啦。