一寿司 (已結業)

Item: 一寿司
Rating: 3
Author: 奧志雷

Sushi One

3.5

79 食记

味道

环境

服务

卫生

抵食

325

屯门

$101-200

日本菜寿司/刺身

奧志雷

等级4

2.1K

依家已經 71 號，應該唔洗等太耐。十點後半價？仲有成個鐘當然係唔等啦，而且費事咩都無得食囉，正價食咩都有，拿拿聲比檯我添呀！都唔知堆住門口仲咩春，企埋一邊等叫號碼啦，阻鬼住晒！

我食日本野向來喜歡依次序 step by step，前菜、刺生、壽司、湯、炸物、料理、燒物、粉麵飯，完美啊。又係比張二人迷你檯，迫迫夾夾，諗住我叫兩碗拉麵就埋單？睇一陣您地點樣放。賤格 ﹗

油甘魚刺生，微微天然魚甜味，淡淡清香，點點魚油可口，軟棉帶滑，食得過。牡丹蝦刺生，質數達標夠滿意，肉黏肉彈，鮮味出眾又帶甜，微量蝦膏甘香無比，好食好食。極上吞拿魚腩刺生，鮮嫩粉紅份外誘惑，聞得到魚香飄飄。入口半溶滑溜溜，溶化了的魚油滲進每顆味蕾，甜美至極又香噴噴 ﹗好味到拍手掌。

海膽軍艦，顏色好鮮艷喎，外觀都好骨子靚仔。不要怕醜，擘盡您的血盆大口一啖將軍艦塞入口 ﹗嘩，腦部即時有種強烈而震撼既觸電感覺，太利害喇 ﹗衝擊全身細胞，打了好幾個冷震呀，腥到爆燈呀！我落單時滿以為係續件計，畫左兩畫依家變左四件添！要硬著頭皮吞多三件勁腥海膽落肚，連爆四次，額頭冒汗，救命呀！

安糠魚肝軍艦，配搭新奇，洒上青蔥及蟹子，沒所謂，成舊啪入口，食左先講 ﹗乾爭爭麻麻地，都係喜歡浸住果醋黎食，較濕潤又較棉滑會好食好多呢。

火炙太刀壽司，居然有冷門野太刀喎，好多年無見，連味道都已經忘記，重溫下先。白魚太刀油脂中規中矩，會有點偏淡。不過炙一炙使到油香更加突出，燒到有燋香味就更香口。魚肉厚而肥味，略帶鮮甜，不錯的選擇。

皇帝蟹棒壽司，大大條好味啖啖肉仿蟹棒，滿足！其實用蟹膏或鰹魚肝醬好過蛋黃醬啦，甜淋淋又感覺降格左，似兒童食品喎。

炸海老卷，我都係習慣叫佢做金龍卷。炸蝦乾爭爭一向唔多喜歡，雖炸得香脆，但太細隻唔多食到蝦肉及蝦味，壽司飯蓋過所有味道，感覺單調。兒時覺得好新奇先會食，依家唔會再叫黎食嚕，女友想食當然另作別論啦。

蟹膏壽司，捲著青瓜片有趣又可愛喎。大量蟹膏見到已滿心歡喜，整舊掉入口，強烈蟹膏甘香味道環繞四周，甜美可口，餘韻清爽，醉人的味道。不過壽司飯又黏又濕又腍，味道欠清香甜醋味，要扣分呢。女友唔食青瓜，等我頂 ﹗

火炙黑和牛壽司，奀滋滋、細猛猛，薄切欠肉汁，質感薄如紙。和牛味道天生太淡，牛味薄弱，就算用火炙後，都未能使其味道顯著提升，飯味比牛味更濃。清淡的牛肉味道，無筋鬆軟棉棉，沾上 wasabi 豉油還好。

灣蠔軍艦，灣蠔第一次聽，東京灣？珍珠灣？但總好過雞煲棧既港島蠔，港島有蠔出產咩？笑鬼死我 ﹗肥美飽滿滑嘟嘟，冰涼而鮮味突出，雖然散發微醒，但味道還可以的，可以添食。

一壽司，吞拿魚腩蓉、三文魚子、燒鰻魚、海膽合體演繹 ﹗鰻魚醬濃濃甜味，遮掩了海膽霸道的腥味。肥美鰻魚、濕潤油香吞拿魚腩蓉、咸香脆脆三文魚子，一次過放入口慢慢嘴嚼。多種食材、質感、味道混得精采萬分，貪心的人夠滿足！

京燒鱈魚，滑溜溜的白色魚肉，油潤充滿光澤閃令令。香噴噴送到，一索香氣撲鼻、精神爽利，聞得到的甜美。質地嫩而多汁，魚油宜人可口，洒上甜醬油同煎更使人不能自拔，一口接一口直至醬魚扒完全消滅。炸軟殼蟹，金黃脆卜卜，乾爽唔會油淋淋，鬆脆唔會硬掘掘，食得到的蟹肉鮮甜、蟹膏甘香突出，難得有水準。

豐富 dinner 多謝 $1100，幸福的感覺。最衰坐得唔舒服，而且隔離位四眼大嬸不停同個女投訴厭壽司舊飯唔夠大，您不如叫碗白飯食啦好無！