三洋餐廳 (已結業)

今日下晝趕住要準備開會嘅野 又要搵間餐廳食個快飯 咁就近近地嚟咗呢間喺路口嘅三洋餐廳🍴三洋好多地方都有 都係一間好普通嘅茶餐廳 真係完全冇期望咁入咗去食 預先講定個結果 其實真係完全冇特別 好一般 唯一優點係快😂不過都要講吓啲野食嘅 我見普遍嘅人都係叫精選午餐㗎啦 咁我都係喺裡面揀一個食 咁就叫咗香煎魚柳煎蛋飯😬 佢附送一個例湯 個中湯就同一般餐廳嗰啲都一樣 都係味精鹹湯啦 飲咗兩啖就冇飲啦個飯就真係好大個 都唔係好食得晒 至於魚柳就係一般雪藏嘅魚柳 但係唔係佢冇落到好多胡椒粉 所以雪藏味都幾重🤕 洋蔥汁就略嫌甜咗啲 不過都係要嚟送吓飯 易入口啲㗎啫整餐快餐只係需時十五分鐘左右 真係啱晒我呢啲連食個飯都要趕頭趕命嘅打工仔呀😅 下次趕時間可以再嚟