養心殿台式養生鍋 (已結業)

養心殿推出九點半後七折，又鍾意食嘢但又唔想比咁貴嘅我，每次都係九點半後先食，真係叫多幾碟都唔使就住就住呀嘛！我每次去都會叫兩個湯底，一邊係麻辣，另一邊係寧神養心鍋。先講講麻辣，佢會送一客鴨血，雖然我唔食，但係男朋友就話佢嘅鴨血好味，而我最鍾意都係擺啲寬條粉落去索晒啲辣味，好正！寧神養心鍋可以先飲湯再打邊爐，我次次都會飲兩碗，再食埋佢鍋入面既烏雞，夠晒補身！如果想買嘅食材包括有手切肥牛、手打墨魚丸、萵筍等等，基本上佢全部食材都好新鮮，無論點樣叫都唔會中伏。