湯底揀咗胡椒豬肚同椰子雞雙拼，豬肚湯啖啖香味傳晒入鼻，椰子雞湯清甜就咁飲都正！
海鮮選擇多樣，大推大蝦剝開蝦膏超香，大大隻啖啖肉，食出鮮味！鮑魚烚完依然爽彈，鮮甜煙靭有口感，我哋encore咗三轉，個個變身海鮮大胃王～
$368特上牛小排餐仲包多款牛肉，美國安格斯牛板腱雪花靚，輕輕一灼牛味晒出嚟；澳洲M5和牛油脂啱啱好，入口仲有陣淡淡奶香；美國SRF極黑和牛肉質軟嫩，款款一定有質素！
菜架擺到成個彩虹咁，台灣水蓮脆到索索聲，紫雨衣甘蘭烚完仲keep到紫色好IGable，最鐘意冰菜啲爆珠口感！仲有熱食部嘅即炸乳鴿皮脆肉爆汁，兩老好鐘意！
最抵讚係阿姐清枱快過我哋食嘢速度！甜品多選擇，雪糕櫃有Häagen-Dazs任食，仲俾我發現到限定口味！！飲品唔多講，清酒任斟仲有冷泡茶解果汁汽水全包。真係由頭飽到落腳趾尾，牛魔王加海鮮控肯定回到本！下次再戰～
