翡翠拉麵小籠包 (已結業)

其實一向對翡翠拉麵印象唔差，以集團式流水作業式經營來說，佢嘅食物都算有啲溫度。今日就挑戰下其他分店嘅水準嚟到港威中心，預咗人多，提早6:00去等位，等左大約20分鐘都唔算好耐。Reception 姐姐講嘢好勞氣，餐廳真係要培訓吓啲職員態度。餐廳面積都唔少，但係座位排得密密麻麻，相隔距離會唔會太近，大家除低口罩就如同枱食飯冇分別。一坐低就放低兩杯熱辣辣嘅茶。店員們做到木口木面咁，陰公。點食物是自助形式，基本上點源菜式5分鐘內就差唔多上齊，速度快得驚人，難怪回枱速度快成咁！雞絲粉皮冇味嘅雞絲加上麻醬太多，食落好溜。小籠包絕對是預早蒸定，小籠包摺位已經微硬，裏面嘅肉餡冇問題，可惜溫度都唔夠熱，完全唔合格，超級失望。全晚最正係「蘿蔔絲酥餅」十級熨口，香酥鬆脆，加上甜絲絲嘅蘿蔔絲，好味，終於有啲似樣嘅嘢食到。擔擔麵麵底已經結成一餅餅，加上麵醬又唔濃味又超咸，頂唔順！暫時依間係我食過最伏嘅「翡翠拉麵」