吉列牛忌廉烏冬專門店 (百樂中心) (已結業)

牛年食下石燒吉列牛，同埋趁凍凍地成日想食D夠熱既野。入到去見張張台都必點吉列牛，就知點呢個SET 一定無錯。點左吉列牛定食SET 2，一個跟飯，一個係咖哩忌廉烏冬配雞肉(可配牛肉)。再叫左個雞軟骨餃子，脆口餃子食食下又有爽口一粒粒軟骨咁，好特別。吉列牛每件細細嚿好好燒，份量充足有一大排，粉唔太厚，燒既時候我建議要燒到全熟，就會冧，如果唔係就會好似有筋。一啖飯一啖牛好好既享受，又有得慢慢燒下玩下，打卡之選，配菜同醬都調得好味，好好既開胃小菜。忌廉咖哩烏冬真係好驚喜，開頭見到個忌廉以為會好膩，但其實好有空氣感，好快同咖哩汁融合埋，解解辣，而且烏冬好煙韌好有口感，我自己幾鍾意，配埋雞肉粒同菇，都幾滋味。同埋唔知係咪有忌廉蓋住，個烏冬keep住食到尾都夠熱。野飲passion punch 好好飲呀，酸酸甜甜，隻色好靚，另外一杯熱蜂蜜菊花蜜都唔錯，飲完暖粒粒。