牛奶冰室 (新葵興廣場)

营业中

休息中

同朋友響葵芳做嘢做到一半覺得有啲肚餓，但係星期日朝送外賣可能等好耐，選擇又好似冇咁多，所以朋友就揀咗牛奶冰室，一來本身行過去唔算好遠，二來望落去都係一般茶餐廳嘅選擇，所以覺得應該冇乜大問題。叫咗一個芝士火腿三文治烘底，火腿同埋芝士都唔算好大塊，主要係放晒喺中間切開嚟睇好似好足料咁樣，食落去就係平平穩穩，食得飽，又唔難食嗰種感覺。另外叫咗一個一口雞球蔥油撈麵，份量係唔錯嘅，不過啲蔥油嘅感覺唔知係咪啲油落晒底，感覺啲聰好似同個麵冇乜關係咁樣，所以食落去嘅感覺都普普通通。另外叫咗個西多士，最大問題係佢啲糖漿已經落晒落去個多士度，所以返到去食嗰陣時已經淋晒，同埋如果覺得太甜，亦都冇辦法改變。