我地一家三口叫左個二人餐 我地唔算大食 所以二人餐夠哂飽
個湯我地就叫左冬蔭海鮮湯
個湯唔錯 唔會太咸太辣 而且入面啲料都足
個海鮮拼盤不過不失 值得一提既係串燒個醬幾好味
第三項我地叫左火車頭菠蘿海鮮炒飯 我地覺得個炒飯有啲過濕同埋過冧 無果種粒粒分明既炒飯口感 同埋個味道有啲淡 不過因為其他菜式都係偏濃味 所以都可以接受
最後個主菜我地就叫左泰式明爐冬蔭羅非魚 條魚煎過 而個湯係冬蔭公湯底 由於係做湯底 所以冇一開頭個餐湯咁濃味 酸酸地配個魚 都算唔錯 條魚都夠大 而且都新鮮既 而個鍋入面都有好多配料 有牙菜、通菜、魷魚、木耳、金菇 重點係仲有我最鐘意既粉絲 個粉絲配冬蔭功湯咁食 超正
跟餐有兩杯飲品 我地一杯叫左泰式凍檸茶 另一杯本身想叫港式既凍檸茶既 但係佢地無港式既😂 唯有叫凍檸水
杯泰式凍檸茶個味我地唔係太鐘意 似係有啲酸既藥水味
因為我地未飲過正宗版既 所以唔知係我地接受唔到個味 定係餐廳整得唔好飲
整體黎講 無咩好突出既位 但當係落樓食晚餐唔想等位 又想食下泰國菜既話 都可以黎食下既
