福來棧茶餐廳 (已結業)

由於要去朗豪坊買野，方便起見，就黎左佢隔離既熟食中心食飯。最出名當然係翠苑農夫包啦，但其實我覺得佢個度普遍既食店都ok架，試過幾間都唔錯，呢間福來棧就係其中一間。呢度有好多唔同既選擇，除左隔離潮州打冷野，佢小菜都有十幾二十款俾你揀，我都揀左好耐，佢另外又仲有D快餐咁，由於我好想食芙蓉蛋飯，所以就叫左佢加埋一個味菜鮮魷同媽咪兩個人食。佢小菜除左野飲仲有例湯，由於兩個飯加埋實在太多啦，所以我地就要拎個環保飯盒出黎裝D返屋企先，免得浪費。芙蓉蛋有好多料，見到冬菇，叉燒，火腿等等，好大塊，我鍾意芙蓉蛋既原因就係因為佢有好大塊蛋食，哈哈。個蛋都幾滑，唔會乾爭爭，不過如果佢個邊再煎得脆少少就正啦。味菜鮮魷都幾好食，好惹味，不過佢有好多青椒紅椒等等，鮮魷唔係勁新鮮，但佢勝在炒得好入味，煙煙unun加埋D咸菜幾好食。我之前都有食過佢D打冷潮州野都唔錯架! 晚飯想食小菜既都可以考慮下佢呀! 佢都KEEP住有人幫襯架，不過當然唔及農夫包多啦。佢服務都幾好，佢會主動拎D野食俾你，跟住收錢又話慢慢唔駛急，而且我地要佢俾暖水又即刻俾，見我地兩個人食仲問我地駛唔駛要多隻碗添，大家下次可以試下呀。