早安越南 (已結業)

屋企無煮飯，放工唯有同女友去撐檯腳，上咗黃埔美食坊行咗個圈，見到早安越南一人餐幾抵食，有湯檬，湯河，炒飯，炒金邊粉，咖哩飯，牛腩飯，香茅豬扒飯，滷肉蛋飯等，款式又多，款款都好吸引，仲包埋特色飲品，有我最愛o既椰汁三色冰同椰汁珍多冰，就揀定入去安坐食晚飯啦。睇完Menu就揀咗兩款一人餐，包括香茅豬扒湯河同越式海鮮蝦膏炒飯，仲配咗一杯龍眼冰同一杯椰汁三色冰。見小食蒜香牛油雞翼好似好吸引就叫咗一份。另外，意外發現越南餐廳有肉骨茶都叫咗一碗。肉骨茶感覺藥材味較重，落足料。蒜香牛油雞翼大隻又香又好味，食完令人好滿足。至於香茅豬扒湯河，河粉配濃味湯頭感覺好夾好好食，湯底令人會想飲多兩啖。越式海鮮蝦膏炒飯就係我至愛，粒粒炒飯炒得又香又入味，蝦膏咸味岩岩好引出海鮮鮮味，配合埋兩杯冰飲真係天衣無縫。我特別喜愛佢地三色冰粒粒豆真係又大粒又甜好好食。食咁多野每位都係$150左右，呢個晚餐好抵食呀。