勝八居酒屋 (已結業)

同同事講開去日本玩，佢介紹一間銅鑼灣嘅居酒屋，話刺身有好多款，又新鮮。見佢講到咁高汁，今日一於book位同朋友去試下。一入到去坐低，已經見到成個刺身bar，掛咗唔同時令刺身嘅名牌喺度。店員都好主動埋嚟問有冇咩刺身想食。店員話今日嘅魴鮄同八爪足唔錯，我哋就試下。第一次食魴鮄lee隻刺身，雖然唔係好重油味，淡淡哋，但係就好新鮮，會食到魚嘅鮮味！八爪足同平時食嗰啲八爪魚刺身分別不大，但係個分開嘅吸盤就好正！完全係未食過咁嘅刺身，有鮮味，咬落又爽口，下次有機會一定再食！話到明居酒屋，梗係飲酒吹水，嗌咗個柚子酒。再叫個炸白蝦佐酒。新鮮即炸嘅關係，嚟到仲係熱嘅。食落咸咸哋，仲有蝦嘅鮮味，唔會炸過頭同得油味，送酒一流最尾食咗個紅豆雪榚，唔太甜，入面仲有紅豆粒粒，作為收尾幾好。