稚內日式創作料理居酒屋 (已結業)

三五知己又出黎食晚飯，朋友介紹左呢間創作料理居酒屋，睇開飯啲食評同相又真係好吸引喎，一於黎試下佢先。餐具好優雅，古典味～先黎個海鮮米通 $48少少辣好惹味，米通香脆，夾埋一齊又幾好味喎。食日本野梗係要點壽司，叫左壽司盛 $178，一客有十四件計返仲平過食回轉壽司，質素又靚好多，鮮甜肥美，個人至愛吞拿同鯛，正。一口牛肉粒 $68，呢個賣相一般，上面有蘿蔔薑蔥蓉。橫切面看下去又幾正喎，食落肉嫩還不錯。叫番啲西式野試下先，德國脆皮咸豬手 $148，大大隻色澤吸引。豬手肉腍非常易切開，皮燒得香脆，皮下脂肪甘香，整體感覺不俗。秋刀魚刺身 $138，呢樣係餐廳新菜式，老闆話好多食客尊程黎揾秋刀魚刺身，刺身用嘅秋刀魚比一般熟食用嘅來貨貴，亦比較肥美新鮮。先試一口，果真鮮甜入口甘香，唔點醬料都唔會腥，好味！最後加多個雞肉忌廉汁意粉 $88，食返啲飽肚野先，汁濃而不膩，意粉有韌性煮得啱啱好，唔錯唔錯。開開心心又過左一晚，秋刀魚刺身成整晚亮點，會為左佢再黎的！