旺角咖喱大皇 (已結業)

好幾年冇食過呢度。今日忽然咖喱癮起，又想去旺角走一轉，就入嚟試試，睇下水準仲keep唔keep得住...基本上你想叫乜類型咖喱都有得你食--- 印度、巴基斯坦、馬來西亞...(除咗日式之外)...仲有自製貨色如什麼船長雞，煎封酸辣豬頸肉等等，真正包羅萬有，形式跟從前灣仔嘅國際咖喱館好近似...唔想攪咁多花臣，還原基本步，只叫個中辣嘅印度咖喱雞...上一枱，見碟白飯中間開咗一個窿，係用嚟方便你放入咖喱跟住拌而食之，實在窩心...咖喱落咗不少洋葱粒而煑，質感偏杰，頗香；雞雖然係雪藏貨，但勝在份量足，小小一碟都有三四件，配菜嘅青瓜條亦頗爽口，薯仔亦夠粉夠淰。可惜所謂嘅中辣都只係小兒科，睇嚟下次再試，一定要叫大辣先得..