話說前幾日膽粗粗，決定帶平時飲茶淨係識叫燒賣蝦餃嘅阿爸阿媽，去觀塘呢間「星海」挑戰下新派創意點心！睇下佢哋嘅傳統味蕾，究竟會係一個點樣嘅衝擊🤣。一入到去，個場地好開揚，樓底超高，配埋啲水晶燈，成個感覺好光猛舒服✨，完全唔似啲傳統酒樓咁嘈雜。最正係佢有個戶外露台，喺度飲茶真係幾寫意☀️。成個環境坐得好自在，店員話午市不限時，可以慢慢同屋企人傾計食嘢，茶芥都係$10一位，幾抵錫。坐低開好茶，我哋就主力進攻佢哋啲手工點心，睇下葫蘆裡賣咩藥！
櫻花蝦蒸蘿蔔糕 (4/5分) 🌸
第一道點心上枱，阿媽已經「咦」咗一聲。平時食開煎蘿蔔糕，呢個係蒸嘅，面頭仲鋪滿粉紅色嘅櫻花蝦，賣相幾靚仔。一啖食落去，蘿蔔糕本身好足料，食到一絲絲嘅蘿蔔，口感好軟糯。面頭啲櫻花蝦帶嚟鹹香同埋脆脆地嘅口感，成件事即刻豐富咗。阿媽話估唔到蒸蘿蔔糕都可以咁好食，算係有個唔錯嘅開始。
藥膳鳳爪 (4/5分) 🌿
呢個鳳爪一上枱就聞到陣陣藥材香，同平時豉汁蒸嘅完全係兩回事。見到有當歸、杞子，阿爸起初仲有啲抗拒，話「咩玩法呀？」。點知佢試完一隻之後，竟然話味道又幾夾喎！鳳爪炆得極度軟腍，一啜就甩骨，藥膳湯汁嘅甘甜味完全滲晒入去，食落暖胃又滋補。對於注重養生嘅兩老嚟講，呢個反而啱佢哋口味。
春風得意腸 (4.5/5分) 🍤
呢個名就夠晒特別，其實係腸粉、炸兩同鮮蝦嘅夢幻組合！外面嘅腸粉皮好薄好滑，中間包住一層脆卜卜嘅網皮（似炸兩），最入面就係爽口彈牙嘅大蝦仁。一啖咬落去有齊「滑、脆、爽」三種口感，層次感一流。呢個點心成功俘虜咗兩老，佢哋都話個配搭好有諗頭，口感好過癮，冇得輸！
蘿蔔叉燒餐包 (4/5分) 🥧
睇落平平無奇嘅餐包，但原來內有乾坤。個包焗得外層微脆，內裡好鬆軟。一搣開，入面嘅叉燒餡除咗有蜜汁香味，仲加咗蘿蔔絲！呢個巧思好重要，因為蘿蔔絲嘅清甜同水份，中和咗叉燒嘅肥膩感，令到個餡食落濕潤得嚟又唔會漏，成個包嘅味道即刻昇華咗。
原籠蔗糖馬拉糕(4/5分) 🍮
最後當然要用甜品作結。呢個馬拉糕標榜用原蔗蔗糖，顏色比較深，睇落好吸引。一上枱熱辣辣，撕開見到入面嘅氣孔好靚，就知佢有幾鬆軟。食落口果然冇失望，蔗糖嘅甜味好清香，唔會死甜，而且糕身好有彈性，充滿空氣感。兩老對呢個傳統中帶點新意嘅甜品都表示冇投訴。
次帶兩老嚟「星海」嘅新派點心大挑戰，總算順利完成！佢哋由開頭嘅半信半疑，到食落覺得幾有特色，證明廚師喺傳統同創意之間攞到個好平衡👍。呢度午市點心出色，睇餐牌見到晚市啲招牌菜都好吸引，好似招牌白胡椒焗蟹飯、遠年陳皮燒鵝伴陳村粉，仲有紅燒煲仔翅乳鴿同招牌白胡椒龍蝦，聽個名都覺得好霸氣🦀！呢度格局咁 grand，絕對係個星級婚宴場地，搞公司包塲都絕對唔失禮。係一個同屋企人食飯或者宴客嘅好選擇！👨👩👧👦
