果子｜海南雞飯·喇沙摻摻 (啟昌樓) (已結業)

琴晚放工就同朋友嚟咗呢間喺太和大埔食星馬菜嘅果子食晚餐。一入去環境都幾闊落，燈火通明咁。睇睇個菜單，選擇都幾多，我就俾佢嗰個新加坡火山包吸引咗，喺牛腩、軟殼蟹同大蝦之間諗咗好耐，最後朋友決定揀大蝦。食星馬菜，冇理由唔叫返個海南雞飯，咁當然就要試一試佢呢度嘅無骨走地海南雞飯。因為最近成日出街食飯，都冇咩點食菜，感覺都相當唔健康，所以就特登揀過清湯雜菜。飲品方面都好節制咁揀咗杞子牛蒡茶，而朋友就揀咗美祿恐龍。嘢食上菜速度都好快，好似唔使5分鐘就已經有食物陸續送上。追求健康嘅情況底下，我覺得呢杯杞子牛蒡茶確實能夠解解我最近食得太膩嘅情況。個大蝦新加坡火山包都真係好大個，份量相當巨型，如果大家都係大胃王就一定要嗌啦。清湯雜菜煲裏面有金菇、唐生菜、娃娃菜，仲有大量嘅豆芽，對於我呢啲長期重口味兼冇菜式嘅人來講，簡直係恩物。