吉祥冰室 (已結業)

元朗站📍吉祥冰室-放假訓到晏一晏，食返個茶記。朗屏站附近見到呢間冰室門面幾新淨，又幾多街坊幫襯，梗係試試佢。藥膳雞湯飯（$58）餐牌寫住用一日一夜熬製嘅湯底，一上台已經見到好足料😋由蟲草花、紅棗、杞子、黨參、淮山、當歸等熬製而成嘅雞湯好夠藥材味，入口甘甜，女朋友最中意佢有淡淡當歸味，雞都有成7-8舊，雞件滑捋捋。估唔到喺茶記都搵到質素唔錯嘅藥膳雞湯飯✨重點係好大碗！女朋友食唔晒梗係我包尾🌝瑞士汁乾炒牛扒河（$58）我呢一個重口味嘅人就梗係叫返個瑞士汁乾炒牛河啦😋河粉炒得好均勻，夠濃味，牛扒都有7-8塊，咬落唔韌 ，而且都幾嫩口！岩晒我呢個大胃王😎上面兩個套餐包例湯同熱飲。例湯都好足料，飲完唔口渴，好鮮甜😋環境方面，以茶記來講都幾企理乾淨，啲餐具呢都係用啲比較懷舊嘅容器盛載，幾有特色。藥膳雞湯飯仲係用公雞碗添啊，真係好耐冇見🙌🏻旁邊啲食客都話大大碟夠晒抵食，女仔好多時都食唔晒添！