OPPA韓國燒肉店 (已結業)

放假約咗友人去咗大埔行山，行完搵好嘢食醫下肚仔先。今次搵咗呢間韓燒，雖然無oppa侍應，但有部大電視播K-POP MV陪你燒嘢食。難得食韓燒一於食豪啲，我哋揀咗海鮮燒肉放題套餐。前菜有芽菜、涼拌海帶同泡菜，食落幾開胃。套餐有一碟海鮮頭盤，有鮑魚、深海虎蝦同大扇貝三款每位各一隻。鮑魚大大隻啖啖肉，口感好爽嫩。餐廳好貼心地喺虎蝦中間𠝹一刀，開邊更加易燒，咬落好彈牙好正。扇貝同蒜一齊燒食落更加香。和牛頭盤上每款牛肉都有一份，上面有紙條標示款式，可按自己喜好再加單。無骨牛肋肉肉質比較結實。黑毛和牛舌比較厚身，食落有口感。黑毛和牛肩胛肉嫩口多汁。真露蜆湯飲落幾鮮甜，湯料除咗蜆外仲有韓式魚糕、蘿蔔、韓式粉絲等。泡菜嫩豆腐湯飲落幾辣，豆腐好嫩滑。辣醬牛肉水冷麵食落好清涼，感覺降火清熱氣。