旺角冰室 (已結業)

雖然旺角真係好多野食，但食飯時間真係會無咩頭水🤯個日咁啱經過呢間冰室，見裝潢幾靚，又好似新開咁，所以決定入去用餐。雪山粒粒法蘭西多士— 雖然係晚飯時間，但真係好耐無食過西多士。見隔離枱嗌左，仲好似好好食咁，於是我都唔執輸🤪 上枱時熱辣辣，即點即整。外層非常脆，切成一粒粒正方形咁，既可愛又方便食用。真係唔錯！香草無骨春雞配意粉— 完全估唔到茶餐廳會咁有誠意，原隻雞上。春雞肉質鮮嫩，容易切開，點埋燒汁食好juicy。和牛漢堡咖喱焗飯— 佢哋嘅咖喱唔係港式咖喱，而係日式果種。和牛漢堡好有牛味，撈埋咖喱食，一啖接一啖。🍛😋凍唂咕— 依家唔係有好多餐廳有唂咕飲，好有兒時風味，而且味道唔太甜，合晒我心意。呢間茶餐廳非常意想不到，價錢唔算貴，但係環境食物方面都做得好好，推介啊！