億饍 (已結業)

旺角食飯一向都幾迫下，又有時間限制，想同朋友好好食餐飯都有D困難，早幾日去咗呢間餐廳又唔錯喎！冇時間限制，而且有齊泰式、越式同港式菜，叫齊唔同國家野食都OK。個花膠烏雞燉湯好足料，個冬菇好大隻煲得好「林」，而且湯嘅鮮味唔錯，推薦～另一個必點嘅係軟殼蟹米紙卷，個軟殼蟹整得好好食同好新鮮，加埋配菜食唔會好油膩，如果可以多D米粉係入面就好喇！仲有豬頸肉燒得好好食，同埋個越式炒金邊粉同出面泰式嘅略有不同，麵質比較乾身，而且冇好酸嘅感覺，配菜變咗札肉同大蝦，感覺都幾特別。另外仲叫咗生菜包（少辣），感覺正常中規中矩；仲有個芒果蟹肉炒飯都係，芒果幾甜不過蟹肉就唔多。雞肉串燒同安格斯肉串燒味道還好，個人覺得如果沙嗲醬煮埋一齊燒會更加好味道～今次食咗算幾多野，每日埋單都係300蚊左右，可惜食唔到生蝦刺身啊（因為賣晒）～餐廳位置唔錯，油麻地地鐵站行幾分鐘就到，成棟都係食肆，不過餐廳本身就有少少窄，香港地寸金呎土啊！