御石燒 (已結業)

旺角新開左間日式石燒餐廳，裝修用左水泥色牆身、混凝土色枱面、鐵皮色門等建材，配搭吊燈、壁燈等裝飾品，簡約得來又好有型格。抽風做得好，樓底又夠高，唔會有油煙味。餐牌有多款定食、丼、小食、雪糕，加$35可升級紫菜味素飯+流心蛋+麵豉湯，加$15就有各款汽水。我同朋友都揀左石頭燒，新鮮既食材經過高溫石燒後 ，不但保持食物既原味道，而且多餘既油脂都會因為高溫而自然流失，呢種食法美味得來又比較健康。御燒特級牛小排：牛小排特別鮮嫩，油脂分佈平均，牛味香濃，用石燒慢慢烤，令肉質更嫩滑。御燒豚肉：豚肉切得好薄，所以好快熟，燒到金黃色，脆卜卜，再沾上餐廳自家製醬汁，口感更加豐富。總結，餐廳位置方便，店員服務態度親切，食物美味又高質，好滿足。