吉壽日本料理 (已結業)

話說我有鋪癮，就係一個星期at least 要食一餐壽司，唔食就會好唔安落。多數我就食元x同板x，初頭百零蚊落樓，之後二百零蚊，近排唔知點解一個人食到三百零蚊。既然係咁，諗諗吓就不如放個平題，起碼有限數。搵過咁多間，旺角嘅吉壽算幾平。一個人放題，個胃有限，唔可以亂嗌，攤開哂啲點餐紙慢慢諗。出面仲有個生果bar，有個甜品區，有湯，有幾種熟食。所以如果我話你知呢度食物有過百種選擇係冇誇張。如果喪屍打到唻，除咗超市，吉壽都係一個避難嘅選擇唻。趁嘢食未唻食件出面嘅生果同章魚燒先。西瓜係甜嘅，章魚燒都係熱嘅。燒元貝，雞軟骨，燒菠蘿，牛柳粒，鰻魚，炙燒左口魚裙邊。剔幾多件佢真係俾足幾多件你，出餐咁快唻講賣相都唔錯。始終得一條友唔嗌咁多，不過我見隔離檯啲刺身的確係大盤大盤咁上。之後食返個香甜嘅牛油粟米，我以為我會飽，但係未。居然有得嗌蟹粥。入面有足一隻細蟹同一隻大蟹殼。埋單先係218。個人唻講我覺得熟食，尤其燒物幾唔錯。