我去嗰陣六點鐘，好少人，7：00之後就係高朋滿座！佢個餐牌真係好多選擇。
我哋揀食邊一個煲都15 16⋯⋯最後都係因為重慶麻辣雞煲可以走辣，所以就點咗佢，後來先發現原來佢係走地雞！
雞煲好大份，雞有雞味，雖然我走辣，但係五會太咸先係重點！加埋啲紅蔥好好味！我啲分別點左油麥菜同埋響鈴！我哋食咗足足個半鐘阿媽已經講咗三次響鈴好靚，絕對唔係次等貨色，老竇就講咗三次油麥菜好甜！可見佢嘅配菜真係好有水準！絕對值得加配！
主角講完，梗係講返前菜！總共有兩碟前菜，最出色嘅係干撈牛肚，辣得恰到好處，好爽口，好好味！出面街真係好多地方都做唔到呢一種水準，淨係去呢間餐廳食呢碟小菜都值！呢啲真係必叫！
第二前菜係夫妻肺片
配料多款式，麻辣味比較重，越食越上癮！講番另一碟主菜！佢亦都係我嘅最愛！
水煮牛肉！佢有得俾我揀五個程度的辣，唔係太食得辣的我，今次梗係叫BB辣。其實都幾辣⋯⋯唔講得笑⋯⋯雖然佢好辣，但係牛柳肉又嫩又滑啫啫，真係好好味！牛柳不會太吸味，酌一點紅油辣味，便回味無窮！下面真係爆多芽菜，好爽口！同牛柳好絕配，蕃薯粉相當好食，如果可以多啲仲開心！IN IN 韌韌，滑滑 LU LU ，好好味! 
最後一碟小食，酥炸雞軟骨，真係要大讚佢嘅炸皮一啲都唔厚，又薄又脆！又唔會覺得好油，雞軟骨好有嚼頭！正
差啲唔記得咗講飲品，佢絕對唔係一味汽水，又或者係街邊買返嚟！真係佢哋自己落咗一隻話梅仔再加梳打，好降火，可以越食越多，又唔會越飲越口渴，正！我哋一人一杯！真係好啱我哋食雞煲同埋辣辣小食主菜。
室內環境很舒服
枱與枱之間唔會太迫，有一定嘅空間！傾計都幾開心！價錢真係非常非常非常之經濟，200蚊食到個肚滿滿，捧著大肚子歸家下次會約多兩三個朋友再嚟食！
