瀧(日韓越) (已結業)

約左朋友喺油塘交收，搞掂就順便去附近買埋外賣先返屋企。喺鯉魚門市場搵到間主打日韓越菜嘅小店，牆上鑲有餐牌，食物包羅萬有，而且定價親民，一於試下。  辣味章魚燒 $30章魚燒大大粒，金黃渾圓，面頭鋪滿木魚碎，咬落質感好軟滑，帶微微辣勁，入面嘅章魚粒爽口彈牙，配上燒汁，夠晒惹味。 甜辣炸雞粒 $38炸雞粒好出色，採用正宗韓式甜辣醬醃製，外層頗酥脆，而內裡嘅雞肉仍然保持嫩滑，入口甜甜辣辣，每一啖盡是滿足滋味。 汁燒牛肉飯 $42 牛肉飯幾有睇頭，頂層放左隻煎蛋，牛肉醃得好入味，肉嫩又多汁，配料有紅蘿蔔、椰菜、洋蔥同冬菇絲等，份量十足，夾埋底層軟熟嘅白飯一齊食，口感好豐富，推介。 香茅雞扒撈檬 $43雞扒煎得好香口，肉質鮮嫩，香茅味突出，檬粉質感爽滑，自行加入撈檬汁，味道啱啱好，酸酸甜甜，非常醒胃，好易入口。