Pancake House HoiHoi (荃新天地) (已結業)

Item: Pancake House HoiHoi (荃新天地)
Rating: 4
Author: furronika

429 食记

味道

环境

服务

卫生

抵食

7715

荃湾

$101-200

日本菜甜品/糖水

345

furronika

等级4

256

Pancake House HoiHoi
📍荃灣楊屋道1號荃新天地1樓117號舖

對上一次嚟Hoi Hoi食pancake原來已經係年頭嘅事，難得今日同朋友去到荃灣，又咁啱見到咁耐無食過嘅Hoi Hoi，當然要去回味一下，同試下佢哋嘅新品啦！

之前一路都未去過荃灣分店，想喺度特別稱讚一下一位戴眼鏡嘅店員，佢唔單止有良好嘅服務態度，而且非常友善同有耐性咁講解每道菜式要留意嘅地方，笑容可掬，咁樣嘅服務態度絕對會令顧客回頭幫襯！

[價錢 Price]
💰$438
超豐盛Hoi Hoi Set 2人前 👩🏻‍❤️‍👨🏻
呢個二人餐真係超豐盛，有齊餐湯、甜品、飲品同兩款主菜，真係少啲食力都唔得！餐湯係固定款嘅煙肉薯茸湯，煙肉同薯仔都已磨成碎碎，整體口感幼滑濃香，能食到幼沙般嘅薯茸，餐前開胃一人一客，份量啱啱好。

主菜有分A、B兩部分，朋友揀咗A嘅漢堡塔，而我就揀咗B嘅大阪燒比薩，兩樣都份量十足，兩個人食有少少吃力，好彩味道都幾好，最終都能成功挑戰(自稱)大胃王！

漢堡塔 🍔
呢個漢堡塔literally就係用漢堡扒堆成高搭，一個漢堡有足足三大塊嘅漢堡，造型真係十分吸睛！因為係牛肉嘅關係，朋友只好一人挑戰呢個漢堡塔，中間仲要夾有煙肉、芝士、洋蔥、醬汁等，好彩有比較清新嘅生菜同蕃茄片中和一下油膩感，如果唔係加埋脆卜卜嘅酥炸薯條，相信要一個人獨食一份都頗有難度！

佢嘅漢堡扒係傳統日式嘅口味，帶有微微嘅洋蔥香氣，每塊都鎖住滿滿嘅肉汁，認真大滿足。加上佢咁巨型嘅size同獨特嘅賣相，我哋見當日每一檯都有叫一份嚟食，真係好受歡迎呢！

大阪燒比薩 🍕
我喺B選項當中揀咗餐廳新品大阪燒比薩，估唔到會有咁大驚喜！原因係睇menu圖片嘅時候，我哋都無見到原來pizza上面係鋪滿日式炒麵，所以嚟到切開嘅時候都有少少嚇親！呢個大阪燒比薩性價比好高，一次過可以食到大阪燒同pizza，而且味道同正宗日式大阪燒都非常接近，加埋經烤焗過而變得脆卜卜嘅麵條，咁有新意嘅料理真係值得一試！

夏威夷果仁忌廉夏威夷班戟 🥞
甜品方面，我哋今次揀咗佢哋嘅招牌Hawaiian pancake，口味則揀咗朋友最愛嘅夏威夷果仁。我想講，大家有機會嚟Hoi Hoi，真係必定要叫返個Hawaiian pancake嚟食，因為真係超級香甜鬆軟，食過包你返尋味！我哋揀嘅呢款夏威夷果仁忌廉口味唔會好甜，發打至軟身嘅輕盈忌廉滿滿蓋住熱辣辣嘅pancake，一切開就冒出香噴噴嘅煙，真係非常誘人。鋪滿喺pancake面嘅係切成粒狀嘅夏威夷果仁，佢脆脆嘅口感同pancake形成強烈嘅對比，估唔到又會咁夾喎。

[價錢 Price]
💰$30 (套餐加配價)
手沖咖啡 ☕️
今次仲可以$30加配一杯咖啡師即場沖嘅手沖咖啡，而且仲有遊戲玩添。落咗單叫手沖咖啡後，店員會俾一個扭蛋機代幣你，你可以去到咖啡師面前嘅扭蛋機，以扭蛋形式抽取以四位著名音樂家命名嘅其中一款咖啡豆，即場睇住咖啡師沖泡咖啡。雖然朋友想試以莫札特命名嘅咖啡，但我嘅神手抽中咗以蕭邦命名嘅咖啡豆，好彩朋友都好欣賞呢種充滿果味嘅咖啡咋。

蕭邦咖啡嘅風味係桃、士多啤梨、櫻桃、香檳、玫瑰等，所以佢嘅味道比較香甜，充滿果香。店員非常之細心，咁介紹呢套同本地烘焙品牌賣啡佛嘅手沖咖啡，又講解兩隻唔同大細嘅玻璃杯會如何影響咖啡嘅味道，估唔到用細啲直徑嘅杯可以飲到較濃郁、較香豆味嘅咖啡；而同一壺咖啡用一隻杯口比較大嘅杯嚟飲，就會飲到更香更突出嘅果味。果然飲咖啡都係好有學問，朋友嘅建議就係趁熱飲，趁咖啡仍然喺熱度足夠嘅時候揮發出濃香嘅咖啡香氣，再用鼻輕輕聞一聞沖剩嘅咖啡渣，忙裏偷閑真係一大享受。

[價錢 Price]
💰$40 (套餐已包)
焙茶牛奶 🥛
因為我唔太好咖啡，所以都係叫返我最愛嘅tea latte。今次我揀咗焙茶latte，佢嘅茶味香濃，而且唔會帶有顆粒感，茶香奶滑，比例堪稱完美，如果再大杯一啲，相信會飲得更暢快！