Spring field (已結業)

係OpenRice見到新開嘅越南河，仲有大少最鍾意嘅是拉差辣椒醬，梗係要來試一次啦。呢間鋪頭同依家有好多新式嘅越南牛肉河一樣，點菜時，都會響張紙仔度問你，要唔要芫荽，洋蔥，要河粉定金邊粉。我就叫咗招牌春園河，大少就叫咗火炙日本和牛河。我同大少梗係揀咗金邊粉啦。碗麵嚟嘅時候，佢都有比青檸辣椒同埋幾片越南嘅香草，但係碗麵喺無生芽菜嘅。我見到隔離有一瓶漬芽菜，望落去好似日本湯麵嘅芽菜咁.....碗河粉好得意個喎，除咗牛肉之外，佢仲加插左有日本味道嘅甜豉油蘿蔔同埋炆牛腩，我個碗仲加埋有燒鴨絲。個湯底，就好似一般嘅越南河粉嘅牛肉湯，但係加埋日本風味嘅蘿蔔，牛腩同漬芽菜，感覺就好似喺越南食日本麵？其實碗麵都幾好食，只要唔好諗住佢係越南式嘅河粉，當佢只係一碗普通嘅蘿蔔牛肉牛腩河，咁就可以啦。