記得第一次食係喺荃灣分店，搬到港島後都好耐無幫襯。
氣溫驟降，正係時候食「咋咋聲」嘅鐵板牛扒，整個用餐過程都可以食到熱辣辣嘅食物。
岩盤選用來自日本嘅牛肉，喺點餐處即叫即切即秤，感覺實在得多。
2
2
餐廳採用先付後取方式，餐牌選擇豐儉由人，由$50-70肉丼，到因應肉類等級由$100多至幾百嘅鐵板牛肉都有，我地揀咗200g後腰三角肉同餐廳新出嘅富士山石板封門柳飯。
等待過程中可以透過玻璃睇到烹煮過程，同時嗅到肉同油脂熏香。
粉藍色米粒堆成富士山狀，極度吸睛，底下嘅飯粒俾鐵板灼成焦香，香脆口感混入牛肉特有嘅油香更加惹味可口；
封門柳喺坊間餐廳較為少見，屬於牛橫膈膜下嘅肌肉，每隻牛得一條（大約兩塊牛扒大小），肉質緊實，油份少，肉味濃，特別適合中意啖啖肉嘅食肉獸。
廚師因應牛肉部位貼心地預留較生嘅程度上碟，過熟容易疑肉質太韌影響口感。
後腰三角肉正好相反，屬於牛前腰與後臀之間，由於較少運動所以脂肪量較豐富，油香重之餘又不失牛肉該有嘅韌勁。
200g份量對於女士的胃嚟講已經足夠，所以無加配飯或沙律，鐵板牛扒餐會附上香甜粟米，將營養拉返均衡XD
三角肉較為厚身，所以食起來感覺更實在飽滿，一口下去滿滿牛香釋出。
另外$40加配了鵝肝，表面煎得香脆，肝身入口即融。
可惜呢日金牛（芒果雪糕加忌廉）全部售罄，改配了黑牛，食住熱野飲返啖冰火嘅感覺特別過癮，同時起到解油膩效果，為呢餐飯寫上完美嘅句號。
