本佐日本燒肉料理 (已結業)

早幾日一支公逛過赫德道，坐低食日本嘢嘅時候，留意到對面大廈3樓有人食露天日式燒烤，好妒忌佢哋囉! 今晚捉咗個friend上嚟食番餐燒烤放題。今年好似無咗個冬天，今晚竟然有廿幾度，所以都唔坐出去坐露天位喇，坐吧檯，睇住廚師摩打手整壽司真係大開眼界。一坐低，職員就會捧一份必食的燒肉拼盤和刺身拼盤，咁就可以燒住先，一路燒一路再落單點嘢食。點嘢食好容易，拎住個平板，篤篤篤，好快就有嘢食。放題包一杯飲品，加$30，就可以任飲清酒、啤酒、汽水，梗係加啦。牛係日本A5級數，我哋兩個一個係食肉獸，另一個係牛魔王，今晚實行食肉獸決戰牛魔王。和牛超正，我哋叫咗好多round。刺身好新鮮，甜蝦好鮮甜，三文魚好肥美。豬五花油脂好香。大蝦燒，肉爽彈牙。坐正摩打手廚師之面，無理由唔支持下佢嘅手勢，所以，叫咗幾款壽司。火脊和牛、蝦、三文魚壽司絕對走唔甩。水準唔錯，食得過。輕口味啲就叫咗蟹籽、三文魚籽和海膽壽司。質素同樣高質。大戰咗幾個回合未分勝負，食埋Movenpick雪糕，就埋單，鳴金收兵。