楓 (已結業)

前排喺油麻地開咗間新店，主打多款日式輕食，有大阪燒、大大個軟綿烤蛋糕、FROYO雪糕、刨冰，最近更加入烏冬主食，食物款式多元化，價錢又合理，下午茶去就最適合不過了😍呢度嘅招牌菜係烤蛋糕，一坐底就好叫啦，因為即叫即整，等候時間都要20分鐘左右，有四款口味選擇，義大利可可、芝麻、焙茶同抹茶，感覺前兩者較普通，後兩者更帶日式風味，見隔離附近都係點後面嗰兩款口味😆上枱時真係嚇親，估唔到蛋糕咁大個，質感鬆軟，帶點咬口，上面塗上滿滿嘅homemade焙茶醬，完全唔甜，而且可以加醬，旁邊仲有水果、紅豆、白玉丸子、蕨餅等，整體口感豐富，作為飯後甜品就最適合不過了，不過建議多人share，唔係嘅話真係會飽死😂淨係食甜嘢難免會覺得膩，所以叫埋個大阪燒中和返，即叫即整，材料滿滿，餡料豐富，椰菜、木魚、粟米、沙律醬同大阪燒醬，鹹中帶甜、配料有得選擇蜆、章魚、蝦或帶子，帶子出面未見過，幾有特色，大大粒，鮮甜可口，可以一試！飲品方面有好多選擇，可惜芝麻豆乳賣曬，要咗焙茶同抹茶口味，豆乳比茶味更突出，所以絕對唔苦，茶底味都幾香，大人小朋友都適合！整體感覺唔錯，仲播住日本音樂好有feel呀🧡