緣聚 (已結業)

緣聚好耐都冇去老人院探姑姐，趁今日放假，一於入去元朗探吓佢順便行吓街。路經西裕街見到呢間食放題嘅餐廳，就同老婆入去試吓。升級放題多咗28品，仲有我最鍾意食嘅生蠔、海膽同中拖羅，梗係要升級喇。未叫嘢食前先去睇吓有乜嘢飲，呢度雪柜有各式汽水啤酒，最特別係有Hoegaarden嘅西柚味啤酒、日本啤同黑啤，咁就攞支西柚啤飲吓先，老婆就飲綠茶。其實仲有好多特式熱飲可以點，我哋又叫咗熱玫瑰洛神花茶，好香洛神花味。👍呢度用QR code入單，非常方便。第一round先嚟半打生蠔及幾款魚生。生蠔都幾新鮮，剛開咗一陣，食落好有海水味，亦非常creamy，抖抖再叫過。😋第一盤魚生有三文魚、吞拿魚、帶子、油甘魚同深海池魚。同時叫咗樽清酒嚟食魚生真係絕配。跟住叫咗幾件壽司，重點係有中拖羅同海胆手卷。👌熱食有鵝肝多士，件鵝肝煎得外脆內軟。清酒煮蜆就份量十足，羊扒醃得好入味。老婆叫咗蝦味噌蟹黃軟殼蟹粥，非常特別。我就叫咗海蜆手打烏冬，都幾好食。😁甜品仲有各式雪糕，實有一款啱你。😜呢度出菜好快，叫完冇耐就有得食，清枱速度亦快，唔會擺到成枱都係嘢，職員服務值得一讚。