札幌拉麵 Miso No.1 x 辛味屋 (已結業)

入到餐廳，環境闊落，幾舒服，坐低之後嗌咗個辛辣拉麵同埋蟹籽沙律。首先講咗個蟹籽沙律先，沙律有好多醬，有切得好幼嘅生菜絲、蘿蔔絲，仲有少少洋蔥絲，當然唔少得蟹籽啦。沙律醬同蟹籽嘅味道配搭得特別好，能夠突出蟹籽嘅鮮味，沙律分量算多，食完之後已經有三分飽。跟住就係辛辣拉麵。拉麵湯底濃厚，食得出唔係味精，而係用豬骨熬嘅湯底。辛辣湯入面加咗紅油有少少麻辣嘅感覺，仲有加咗肉碎、粟米、海帶，配料都算多。拉麵質地適中唔會太硬，亦都唔會過份稔， 而且係呈波浪形嘅卷麵。整體而言，價錢合理，份量算多，賣相不錯，得閒想食拉麵都可以去試下嘅。