一木小料理 (已結業)

中式三餸飯就食得多，日式三餸飯就真係第一次食。今日叫左茄子田樂燒、秋葵配薄荷乳酪、韓式豬腩肉配泡菜。我同意有個食評話分量係小，普通男仔未必夠食，我有點運動量既人就絕對唔夠食。所以最後我加多左個飯（唔駛錢）就夠飽喇。咁講返啲食物先。基本上各樣都幾好味。個茄子唔油，個味都幾好。個秋葵配乳酪又幾過引，甜甜地酸酸地又幾清新。韓式豬腩肉呢個味唔係就咁拎啲泡菜撈埋就算數。我覺得佢有啲日式既煮法，用左麵醬去煮左個汁，所以唔會咁悶。