🏘️ 餐廳屬 “樓上舖”, 行兩層樓梯, 見到鮨店入口, 走過門簾, 中間係服務員工作台, 男女洗手間喺左邊, 直望係十人L型壽司吧枱, 空間非常闊落, 十個讚! 另設一張四人方枱, 怪怪地. 裝修走簡約風格, 冇乜花巧嘢.
🥢 今日點咗12貫壽司套餐 $680+10%, 其他選擇: 10貫壽司套餐 $480, 又或者刺身壽司套餐 $1,180. “長介” 又唔睇價錢, 揀咗貴價清酒, 盛惠 $1,080.
📖 聽講鎮店日本師傅 Adachi san 去年底返咗日本. 現在駐塲嘅日本師傅係 Sugano san, 今日招呼我哋嘅係本地師傅 “魚 san”, 剛由姐妹店 “鮨慎 Kami” 調過嚟.
🍥 茶碗蒸
🍣 壽司
左口魚
深海池魚
甜蝦
九繪魚
赤貝
昆布海膽
中拖羅
赤身醬油漬
大拖羅
鯖魚
池魚
吞拿魚手卷
🥰 酒肴
八爪魚
鮟鱇魚肝
🍥 玉子燒
🥣 麵豉湯
🍮 焙茶奶凍
1
1
🍥 茶碗蒸. 夠熱, 合格.
🍣 左口魚. 味道相對淡麗, 食落口感充實, 煙煙韌韌, 過關! 聽聞 Shion 嘅舍利偏酸, 又唔覺喎.
🍣 深海池魚. 魚油豐富, 我鍾意呢個實淨嘅口感, 同啱啱 “軟癩癩” 嘅左口魚形成對比, 有趣!
🦑 八爪魚. 腍呀, 又入味, 可惜份量太少, 哈哈.
1
🦐 甜蝦. 三隻蝦, 入口澎湃, 既鮮甜, 又膠口, 唔錯!
🍣 九繪魚. 陌生嘅名字, 屬於深海石斑魚. 肉質飽滿, 且具彈性. 玩炙燒, 聞落, 食落, 吞落, 都享受馥郁香味, 但又唔會油淋淋, 不俗!
🐚 赤貝. 大隻兼厚肉, 鮮味海水味湧出, 掂!
1
🐚 昆布海膽. 初嚐昆布版本, 味道更濃郁, 口感更渴身, 完美享受海膽鮮味, 十個讚!
1
🥰 鮟鱇魚肝. 入口軟綿, 雪糕口感, 咁香味道慢慢滲出, 又係份量太少, 哈哈.
1
🍣 中拖羅. 魚味濃郁, 柔潤肥美, 鐵銹味絕配醬油味, 我鍾意!
🍣 赤身醬油漬. 相比 “中拖羅”, 口感更細𡟹, 醬油味更甘香.
1
🍣 大拖羅. 完全見唔到脂肪紋嘅? 雖然有點失望, 但醬油發揮更精彩. 中拖羅, 赤身, 大拖羅, 就係傳說中嘅 “鮪魚三連發”.
🍣 鯖魚. 原始經典版本, 相對厚切, 入口滑溜, 重魚味, 抵讚!
1
🍣 池魚. 賣相出色, 盡顯師傅刀功. 食落魚肉緊緻, 又非常肥美.
🍙 吞拿魚手卷. 吞拿魚蓉味道香濃, 引人入勝, 配脆脆紫菜, 充滿驚喜.
1
🍥 玉子燒. 質感軟綿, 甜度啱啱好. 
1
🥣 麵豉湯. 熱辣辣, 好味道, 順便解酒醉.
🍮 焙茶奶凍. 茶味搶鏡, 完美結束.
🤗 總結: Shion 走中高檔路線, 以日本師傅作招徠, 坐位舒適濶落, 可能空間太大, 講嘢聽嘢好空曠, 傾密計有點困難, 扣分. 服務貼心到位, 師傅有問必答. 論食物, 傳統江戶前風格, 魚料優質, 調味簡單, 十二貫壽司之外, 加料 鮟鱇魚乾 同埋 八爪魚, 多謝唒! 香港地, 日本餐廳五花八門, 人外有人, 天外有天, 今日有緣到此一遊.
📖 翻查資料: “江戶前” 原指 “江戶城前的河灣”, 即現在嘅東京灣, 當時魚類品種豐富. 另一個意思係 “江戶前” 嘅 傳統壽司製作方法 或者 手握壽司哲學. 江戶時代尚未出現如今先進嘅交通工具同埋雪櫃, 人們想出不同嘅方式保存海鮮食材, 包括煮, 醃, 浸泡等, 演變出一套製作壽司嘅哲學.
