榮安小食

营业中

休息中

榮安，由細睇到佢大，亦由細食到佢大，不過近十年已冇乜幫襯，除咗一次唔舒服叫咗碗外賣油麵(加魚蛋、豆腐、腸仔、雞蛋、獅子狗魚蛋)返屋企送藥外，細妹今年會間中買兜淨餸俾我，好似今日咁～魚蛋、豆腐、雞蛋、蝦卷。細個最喜歡食佢嘅魚蛋同雞翼！魚蛋口感實淨，雞翼色澤吸引，兩款同樣入味！尤其雞翼，鹹中帶甜，你會連皮食得一乾二淨！而佢另一吸引長長人龍嘅原因係因為佢嘅汁！我唔鍾意食辣都覺得佢啲汁正！鍾意食辣嘅就更加覺得佢啲咖喱辣汁超正！我都試過，又鮮味又夠辣，好難抗拒！不過好明顯係陳年老汁所以咁入味！店舖格局至今一直冇變過，老中兩代老闆娘同伙計依舊冷淡唔多笑容，衛生環境更加唔好奢望太多，所以由細到大我同屋企人大多買外賣，寧願俾貴$1，因為實在坐唔落去！時至今日，所有食品價錢均已漲價，但食物質素明顯退步！細妹買過三次腸仔(雞肉腸)俾我，兩次條腸都浸到變咗灰白色！又淡又霉又冇味！好明顯係冇人買、烚完又烚、浸咗喺水中超過一日，最後益我！嚇到我叫細妹以後千萬唔好再叫，$5/$6一條灰腸，感覺真係可以貴到嚇死人！難食到嚇死人！魚蛋味道同細個食嘅一樣，冇變，口感依然實淨！豆腐就普普通通，都係白烚加汁，我要自己點甜醬