去到門口，我俾門口既decoration吸引左，擺滿好多酒樽，有唔同牌子既啤酒，呢間餐廳係bar and grill ，有酒飲又有野食。餐廳入面既decoration無論地磚，梳化，或碟，都充滿西班牙風情，地方亦好大，容納好多張枱，好寬敞。
今晚我地食左「水牛芝士沙律」、「香辣蒜香橄欖油大蝦」、「蟹肉蟹膏寬條麵」、「安格斯牛小排」、同埋兩杯西班牙風味既Cocktail 「Sangria White」
水牛芝士沙律（$88）
呢個沙律既焦點係鋪面上果幾舊水牛芝士，好有口感，同時係口腔度有淡淡既芝士乳香味，我比較中意乳源水牛既芝士，個口感同味道比較清淡。沙律除左有沙律菜，仲有橄欖，加埋醋，酸酸地，好開胃，為下道菜做好準備。
香辣蒜香橄欖油大蝦（$58）
侍應一上菜，已經聞到好香既蒜味，蝦既size亦算大隻，調味用左蒜頭，紅椒，相當惹味，用橄欖油黎煎，而取代平時多數用既牛油，鮮蝦既味道無被搶走，保留到個鮮味。
蟹肉蟹膏寬條麵（$268）
對蟹膏心心眼既我，我成晚既期望係呢碟寬條麵。我好中意食蟹膏，而用蟹膏黎煮寬條麵，我係第一次食。蟹肉同蟹膏既比例都平均1:1，啖啖都有蟹肉，而蟹膏味唔會太濃，我覺得岩岩好，配寬條麵原來係可以咁夾。
安格斯牛小排（$188）
呢個安格斯牛小排既肉質嫩，唔會韌，肉質已入晒味，個醬汁偏向酸酸地，一邊係蕃茄汁，另一邊係忌廉，將兩隻汁撈埋一齊食，中和返個酸味，我比較prefer撈晒兩邊汁黎食，再食埋啲配菜，有南瓜粒，令到成個菜式無咁單調，亦充滿西班牙既風味。
Sangria White （$108/gls)
黎得西班牙餐廳，當然唔少得西班牙風味既cocktail 啦～Sangria 係西班牙著名既國酒，呢杯西班牙水果酒，故名思義係有生果，有橙、檸檬、蘋果等生果，同埋加入白酒做基底，再加入梳打水，充滿西班牙夏日既風情，淡淡白酒味，配白酒其實比較適合，白酒既澀味比紅酒淡，唔會蓋過新鮮生果既清甜味，呢杯cocktail 好岩女仔飲，好飲得黎又健康～
朋友今次真係無介紹錯，以食物既味道相對價錢黎講，我覺得唔算貴，由其果個安格斯牛小排，另外侍應既服務態度同埋餐廳既環境清潔都好好，令客人食得舒服自在～
