孖啡 (已結業)

孖啡都算係幾出名嘅旺角樓上Cafe，未有疫情前同舊同學聚會都間唔中上嚟呢到，貪呢到地理位置夠晒方便，野食選擇夠大眾化，又可以一大班人一齊玩下唔同嘅Board Game，質素咁多年嚟亦保持到穩定水準，環境好舒服(特別係而家人少)，呢日就約咗個舊同事上嚟傾下計、食個飯咁。呢到有幾個Dinner set，唔夠食可以再加小食。我呢日就叫咗個黑松露野菌意大利飯，濃郁黑松露味相當，配埋意大利飯獨有Creamy質感，絕對係一個無得輸嘅組合。另外，唔好睇佢份量唔係好多，但係食晒成碟飯落肚就已經好飽肚。 朋友就嗌咗呢set軟殼蟹黑松露意大利粉，一樣都係好重黑松露味，佢覺得呢個意粉軟硬度唔錯，唔會話太硬／太軟。成碟意粉嘅調味功夫做得唔錯，大大隻軟殼蟹好滿足！跟餐兩杯飲品，分別有呢杯審判 (青蘋果，菠蘿，薄荷，檸檬沙冰)同埋呢杯惡魔 (藍莓鮮打沙冰)跟餐加$28，可以加配一件芝士蛋糕，質素叫做可以！埋單落樓三百蚊鬆啲，食物質素唔錯、環境又舒服，相當滿意。